AgriKonsulta hija inizjattiva nazzjonali dinamika li ġiet imnedija fl-2024 bil-missjoni li tipprovdi gwida professjonali, għarfien xjentifiku u soluzzjonijiet prattiċi lill-bdiewa u lir-raħħala ta’ Malta u Għawdex. Din ġiet stabbilita biex tgħin lill-komunità agrikola lokali tħaddan tekniki ta’ biedja sostenibbli u moderna li jtejbu l-produttività filwaqt li jipproteġu l-ambjent. Bħala parti mill-impenn usa’ ta’ Malta lejn agrikoltura sostenibbli fit-tul, AgriKonsulta tifforma komponent essenzjali fil-qafas ta’ appoġġ agrikolu tal-pajjiż. L-inizjattiva hija kofinanzjata mill-Unjoni Ewropea, li tirrifletti is-sostenibbiltà u r-reżiljenza fis-settur agrikolu fuq livell reġjonali.
Is-servizzi ta’ AgriKonsulta huma maħsuba biex iwieġbu għall-ħtiġijiet tal-bdiewa u r-raħħala li qed jinbidlu maż-żmien, billi joffru pariri personalizzati, żjarat fuq il-post u aċċess għal għarfien professjonali f’oqsma ewlenin tal-ġestjoni tal-uċuħ u tal-bhejjem.
L-inizjattiva tiffoka l-aktar fuq żewġ pilastri ewlenin:
Permezz tal-IPM, AgriKonsulta tippromwovi approċċ preventiv, ibbażat fuq l-osservazzjoni u li jirrispetta l-ambjent għall-kontroll tal-pesti. Din l-istrateġija tfittex li tnaqqas l-użu eċċessiv ta’ prodotti għall-protezzjoni tal-pjanti billi tinkoraġġixxi tekniki naturali ta’ kontroll, tissorvelja l-popolazzjonijiet tal-pesti, u tapplika miżuri ta’ kontroll biss meta jkun meħtieġ. Billi jaddottaw il-prinċipji tal-IPM, il-bdiewa jistgħu jgħinu u jippreservaw il-bijodiversità, itejbu s-saħħa tal-ħamrija, u jħarsu l-kwalità tal-arja u tal-ilma, u b’hekk jikkontribwixxu għal ekosistema aktar bilanċjata u reżiljenti.
Fl-istess ħin, AgriKonsulta tagħti importanza kbira lill-użu sostenibbli tal-fertilizzanti u l-prattiki agrikoli oħra, billi tipprovdi pjanijiet personalizzati ta’ fertilizzazzjoni u rakkomandazzjonijiet fuq metodi effiċjenti tal-bdiewa li jnaqqsu l-ħsara li potenzjalment ikun hemm fuq l-ambjent. L-inizjattiva tappoġġja lill-bdiewa permezz ta’ analiżi dettaljati tal-ħamrija u tal-ilma, sabiex jgħinuhom jieħdu deċiżjonijiet ibbażati fuq data dwar il-ġestjoni tan-nutrijenti u l-ippjanar tal-uċuħ. Dan mhux biss itejjeb il-ħsad u l-profittabbiltà, iżda wkoll inaqqas ir-rimi tan-nutrijenti fl-ekosistemi tal-madwar u jħares il-fertilità fit-tul tal-art agrikola. Fl-aħħar nett, AgriKonsulta sservi bħala pedament ewlieni għall-moviment tal-agrikoltura sostenibbli f’Malta, billi tgħaqqad il-għerf tradizzjonali tal-bdiewa mal-innovazzjoni xjentifika moderna, u tiggwida lill-komunità rurali lejn futur aktar aħdar u produttiv.
Pilastru ieħor ta’ AgriKonsulta huma s-servizzi ta’ konsulenza dwar il-bhejjem li inizjalment huwa ffukat fuq is-settur tal-majjal, maħsub biex jappoġġja lir-raħħala tal-majjal. Is-servizz għandu l-għan li jtejjeb il-prestazzjoni riproduttiva tal-majjal, isaħħaħ il-bijosigurtà u l-prevenzjoni ta’ mard, iżid l-effiċjenza tal-għalf u l-produttività ġenerali tal-irziezet. Billi jipprovdi pariri f’waqthom dwar il-ġestjoni tas-settur, dan is-servizz jgħin lill-bdiewa jieħdu deċiżjonijiet aħjar, iżidu l-produzzjoni tal-majjal u jiksbu ġestjoni u profittabilità aħjar tal-irziezet. Fuq livell usa’, dan jikkontribwixxi għal produzzjoni lokali tal-majjal aktar stabbli, isaħħaħ is-sigurtà alimentari nazzjonali, u jippromwovi industrija tal-majjal f’Malta u Għawdex li tkun aktar sostenibbli u effiċjenti.
