Partijiet interessati varji talbu Politika Agrikola komprensiva għall-Gżejjer Maltin sabiex tipprovdi direzzjoni strateġika nazzjonali għal dan is-settur dinamiku.

Is-settur agrikolu fil-Gżejjer Maltin issawwar mill-ġdid b’mod sinifikanti wara l-adeżjoni ta’ Malta fl-Unjoni Ewropea u għadhom għaddejjin bidliet fl-aspetti varji tiegħu. Għaldaqstant, din il-politika ta’ għaxar snin hija maħsuba biex tmexxi s-settur agrikolu f’direzzjoni aktar sostenibbli billi tipprovdi l-mezzi li bihom jista’ jiżviluppa u jiffjorixxi, filwaqt li jibqa’ fil-parametri tal-Politika Agrikola Komuni u regolamenti pertinenti oħrajn.

Il-Politika Agrikola għall-Gżejjer Maltin 2018-2028 hija maħsuba biex tipprovdi direzzjoni ċara għall-partijiet interessati rilevanti kollha li jvarjaw minn entitajiet pubbliċi involuti biċ-ċertifikazzjoni, il-permessi u t-teħid ta’ deċiżjonijiet, sa entitajiet privati involuti direttament fix-xenarju agrikolu li għandhom il-ħsieb li jinvestu jew jiddiversifikaw in-negozju tagħhom. Bħala l-objettiv globali għal din il-Politika Agrikola, l-entitajiet tal-gvern, ir-rappreżentanti tas-settur privat u l-komunità tal-biedja identifikaw u qablu dwar ‘viżjoni’ għas-settur agrikolu Malti. Din il-viżjoni tikkontempla l-iżvilupp ta’ politika li għandha fil-mira dawn il-miri kritiċi li ġejjin:

• Li tiżdied il-kompetittività tal-bdiewa attivi u dawk li jrabbu l-bhejjem billi jkun hemm fokus fuq il-kwalità u titħeġġeġ id-diversifikazzjoni;
• Li jiġi ffaċilitat id-dħul ta’ bdiewa żgħażagħ billi jinħoloq settur tan-negozju agrikolu kosteffettiv;
• Li titrawwem sostenibbiltà tal-attivitajiet tal-biedja billi jkun hemm adattament għall-kundizzjonijiet ġeoklimatiċi lokali;
• Li jiġi żgurat li l-art għall-biedja hija mmaniġġjata minn bdiewa ġenwini għal skopijiet agrikoli u attivitajiet relatati.

Il-Politika Agrikola Nazzjonali għall-Gżejjer Maltin 2018 – 2028