Id-Direttorat tal-Agrikoltura għandu l-għan li jsaħħaħ il-kompetittività, jippromwovi s-sostenibbiltà, u jiżgura prodotti agrikoli ta’ kwalità għolja permezz tal-approċċ olistiku tiegħu li jiġbor fih ir-riċerka u l-avvanzi teknoloġiċi ta’ AgriHub u s-servizzi ta’ appoġġ ta’ AgriConnect.

Id-Direttorat tal-Agrikoltura għandu diversi mezzi ta’ komunikazzjoni bħall-midja soċjali u jorganizza wkoll sessjonijiet ta’ informazzjoni biex il-pubbliku, il-bdiewa u l-partijiet interessati jinżammu infurmati dwar proġetti, riċerka u inizjattivi li jkun għaddejjin.

AgriHub hu inizjattiva ewlenija tad-Direttorat tal-Agrikoltura li nħoloq bil-għan li juża r-riċerka u t-teknoloġija sabiex tissaħħaħ il-kompetittività fl-agrikoltura ta’ Malta. AgriHub jiffoka fuq prodotti agrikoli lokali, iwettaq riċerka u jaqsam is-sejbiet permezz ta’ sessjonijiet ta’ informazzjoni u l-mezzi tal-komunikazzjoni.

AgriConnect toffri firxa ta’ servizzi lill-bdiewa u lill-partijiet ikkonċernati, inkluż għajnuna fl-ippjanar tal-ġestjoni tal-irziezet u l-egħlieqi agrikoli tagħhom, għajnuna fl-ippjanar tal-għelejjel, teħid ta’ kampjuni tal-ħamrija, gwida fil-konformità tar-regolamenti, riċerka dwar l-arkivji tal-art biex ikun hemm kuntest storiku tal-użu u s-sjieda tagħha u servizz ta’ konsultazzjoni dwar il-ġestjoni ta’ organiżmi li jistgħu jagħmlu ħsara lill-egħlieqi u l-pjanti.

AgriConnect toffri firxa varjata ta’ programmi ta’ taħriġ li jwassal anke għal ċertifikati mfassla biex jgħinu lill-bdiewa sabiex jissodisfaw l-obbligi legali u jtejbu l-prattiċi agrikoli tagħhom. Dawn il-korsijiet ikopru oqsma bħall-Miżuri Klimatiċi Agro-ambjentali, Obbligi tan-Nitrati u Prodotti għall-Protezzjoni tal-Pjanti. Dawn il-korsijiet iservu biex il-bdiewa jkunu konformi filwaqt li jtejbu l-ħiliet u l-għarfien tagħhom fis-settur.