Introduzzjoni

L-Iskema Nazzjonali tal-‘Prodotti ta’ Kwalità’ hija skema volontarja nazzjonali rikonoxxuta mill-Kummissjoni Ewropea, miftuħa għall-atturi interessati kollha li jagħmlu parti minn katina ta’ valur agrikolu rikonoxxuta, involuti f’sett ta’ attivitajiet li kollettivament iżidu l-valur ta’ prodott agrikolu speċifiku. Dan jista’ jinvolvi l-Produzzjoni, l-Ipproċessar, l-Ippakkjar, il-Ħażna, it-Trasport u d-Distribuzzjoni ta’ prodott agrikolu. Din l-iskema nazzjonali tistabbilixxi speċifikazzjonijiet vinkolanti ta’ prodotti jew metodi ta’ produzzjoni li jirrikonoxxu metodi ta’ produzzjoni u biedja u dawk l-elementi li jikkaratterizzaw il-kwalità superjuri tal-prodott.

L-iskema hija bbażata fuq erba’ pilastri, speċifikament:

1. Standard

L-iżvilupp ta’ standards speċifiċi (f’kollaborazzjoni mal-partijiet interessati) għal prodotti tal-ikel fejn il-prodotti finali għandu jkollhom karatteristiċi speċifiċi tal-prodott, jew l-ispeċifiċità tagħhom hija bbażata fuq biedja jew metodi ta’ produzzjoni speċifiċi jew jekk il-kwalità tal-prodotti tmur lil hinn b’mod sinifikanti mill-istandards kummerċjali fir-rigward tas-saħħa pubblika, tal-annimali jew tal-pjanti, il-benesseri tal-annimali jew il-ħarsien ambjentali. L-Istandards tal-Ispeċifikazzjoni tal-Prodott approvati mill-Kummissjoni Ewropea jistgħu jiġu aċċessati hawn.

2. Kontrolli

Wara espressjoni ta’ interess, il-Korpi ta’ Kontroll approvati mid-Direttorat iwettqu spezzjonijiet fuq il-post kif stabbilit fil-pjan ta’ kontroll biex tiġi żgurata l-konformità mal-kriterji ta’ produzzjoni stabbiliti fl-istandard. Kwalunkwe entità li tixtieq tikseb approvazzjoni bħala korp ta’ kontroll tista’ tapplika għal rikonoxximent skont il-linji gwida pprovduti.

3. Traċċabbiltà

Tfasslet sistema ta’ traċċabbiltà bbażata fuq il-web li hija aċċessibbli mill-partijiet interessati kollha involuti fil-produzzjoni ta’ prodotti ċertifikati sabiex tgħinhom jittraċċaw il-moviment tal-prodott fil-katina tal-valur. Kwalunkwe attur li jixtieq jieħu sehem fl-iskema għandu jissottometti dokument tat-traċċabbiltà konformi mal-linji gwida stabbiliti mid-Direttur.

4. Sorveljanza tas-Suq

Id-Direttorat se jwettaq spezzjonijiet tas-suq regolari biex jiżgura li huma biss il-prodotti u l-lottijiet iddikjarati jkunu identifikati bil-logo.

Objettiv

L-Iskema Nazzjonali tal-‘Prodotti ta’ Kwalità’ għandha żewġ objettivi ewlenin:

1. Li tippromwovi, tikkwalifika u xxerred prodotti agrikoli sabiex tagħtihom valur, kif ukoll toħloq kuxjenza u apprezzament għal tali prodotti.

2. Li tikseb iċ-ċertifikazzjoni tal-Marka ta’ Kwalità rikonoxxuta nazzjonalment li turi li l-prodott/i inkwistjoni huma rikonoxxuti u jaderixxu mar-regolamenti stabbiliti tal-iskema tal-kwalità u għaldaqstant għandhom jitqiesu ta’ kwalità superjuri.

Rwol tad-Direttorat

Ir-rwol tad-Direttorat tal-Agrikoltura permezz tat-Taqsima tal-Politika Regolatorja huwa li jistabbilixxi r-regoli għall-implimentazzjoni tal-iskema, il-kriterji amministrattivi, jippubblika speċifikazzjonijiet vinkolanti għall-prodott u l-metodi u jimplimenta sistema ta’ kontroll effettiva li tiżgura li dawk il-prodotti li jaqgħu taħt din l-iskema jissodisfaw l-istandards ta’ kwalità superjuri stabbiliti. Għal prodotti agrikoli li għalihom għad ma ġewx stabbiliti u approvati l-ispeċifikazzjonijiet tal-prodott mill-Kummissjoni Ewropea, tista’ tiġi ppreżentata proposta tal-ispeċifikazzjoni tal-prodott lid-Direttur għal rieżami, minn kwalunkwe attur li jixtieq jieħu sehem fl-Iskema Nazzjonali tal-‘Prodotti ta’ Kwalità’.

Bażi Legali

LS 427.90 Regolamenti dwar l-Istabbiliment ta’ Skema Nazzjonali tal-‘Prodotti ta’ Kwalità’.

Aktar Informazzjoni

Tikkettar tal-Prodotti tal-Iskema Nazzjonali tal-‘Prodotti ta’ Kwalità’

Il-prodott li huma konformi mal-Iskema Nazzjonali tal-‘Prodotti ta’ Kwalità’, flimkien ma’ kwalunkwe informazzjoni meħtieġa oħra stipulata minn regolamenti oħrajn, għandu jkollu l-logo li jidentifika l-marka “Prodotti ta’ Kwalità” u l-isem tal-prodott stabbilit rikonoxxut għal dik il-katina tal-valur. Kwalunkwe operatur li jieħu sehem fl-iskema li qed jaħseb biex juża l-Logo tal-‘Marka ta’ Kwalità’ għandu jsegwi r-Regoli għall-użu tal-Marka ta’ Kwalità.