Id-Database Nazzjonali Uffiċjali Malti dwar id-Disponibbiltà ta’ Materjali Riproduttivi ta’ Pjanti Organiċi

Skont l-Artikolu 26 tar-Regolament (UE) 2018/848, ġiet stabbilita database nazzjonali għall-elenkar tal-materjal riproduttiv tal-pjanti organiċi u fil-fażi ta’ konverżjoni, esklużi n-nibbieta iżda inkluża l-patata taż-żrigħ, li huma disponibbli fil-Gżejjer Maltin. Id-Direttorat għall-Ħarsien tal-Pjanti ġie nnominat biex jamministra u jimmaniġġja din id-database.

L-iskop tad-database huwa li tiġi kondiviża informazzjoni dwar id-disponibbiltà ta’ materjal ta’ pjanti organiċi u fil-fażi ta’ konverżjoni u għaldaqstant jiġi ffaċilitat l-akkwist ta’ żrieragħ iċċertifikati bħala organiċi għall-komunità tal-biedja organika. Jekk tfittex fid-database u ssib li l-varjetajiet li teħtieġ mhumiex disponibbli, għandek titlob deroga mid-Direttorat tal-Agrikoltura qabel ma tixtri u tuża żrieragħ mhux organiċi billi tibgħat email lil ikeltakwalita.mafa@gov.mt.

Huwa obbligatorju għall-fornituri li jipprovdu materjal riproduttiv tal-pjanti organiċi jew tal-patata taż-żrigħ li jirreġistraw il-materjal kollu ta’ propagazzjoni organika disponibbli f’Malta mal-amministraturi tad-Database tal-Materjali Riproduttivi tal-Pjanti (Ħarsien tal-Pjanti). Barra dan, il-fornituri li qed jiġġeneraw, jippakkjaw u/jew jipparteċipaw ukoll fit-tikkettar tal-materjal riproduttiv tal-pjanti organiċi jridu jissottomettu wkoll l-attività tagħhom lis-sistema ta’ kontroll organiku amministrata mill-Awtorità ta’ Malta għall-Kompetizzjoni u għall-Affarijiet tal-Konsumatur (Awtorità ta’ Kontroll).

Reġistrazzjoni fid-Database tal-Materjali Riproduttivi ta’ Pjanti Organiċi

Varjetajiet, għal liema hemm disponibbli materjal riproduttiv tal-pjanti jew patata taż-żrigħ prodotti bil-metodu ta’ produzzjoni organika skont ir-Regolament (UE) 2018/848, għandhom jiġu rreġistrati fid-database fuq talba tal-fornitur.

Kwalunkwe varjetà li ma ġietx irreġistrata fid-database għandha titqies bħala mhux disponibbli u mhux rikonoxxuta bħala derivat minn sors rikonoxxut.

Id-Direttorat tal-Ħarsien tal-Pjanti jaġġorna d-database matul l-ewwel nofs u t-tieni nofs tas-sena, fejn dawn il-bidliet għandhom jirriflettu l-aġġornamenti pertinenti għal kull speċi jew grupp ta’ speċi kkultivat lokalment.

Kundizzjonijiet għar-Reġistrazzjoni

Għar-reġistrazzjoni, il-fornitur irid:

• Juri li hu jew l-aħħar operatur, f’każijiet fejn il-fornitur qed jimmaniġġja biss materjal riproduttiv ta’ pjanti jew patata taż-żrigħ ippakkjati minn qabel, kien suġġett għas-sistema ta’ kontroll skont ir-Regolament (UE) 2018/848 u r-regolamenti delegati u ta’ implimentazzjoni tiegħu;
• Ikun f’pożizzjoni li juri li l-materjal riproduttiv tal-pjanti jew il-patata taż-żrigħ li se jitqiegħdu fis-suq huma konformi mar-rekwiżiti pertinenti għall-materjal riproduttiv tal-pjanti u l-patata taż-żrigħ skont ir-Regolament (UE) 2018/848;
• Jagħmel disponibbli l-informazzjoni kollha dwar il-materjal riproduttiv tal-pjanti jew tal-patata taż-żrigħ u d-disponibbiltà tagħhom, u jintrabat li jaġġorna din l-informazzjoni fuq talba tal-maniġer tad-database jew kull meta jkun meħtieġ tali aġġornament biex jiġi żgurat li l-informazzjoni tibqa’ affidabbli.

Il-maniġer tad-database, bl-approvazzjoni, fejn meħtieġ b’konsultazzjoni mal-awtorità kompetenti, jista’ jirrifjuta applikazzjoni ta’ fornitur għal reġistrazzjoni jew iħassar reġistrazzjoni li qabel kienet aċċettata jekk il-fornitur ma josservax ir-rekwiżiti.

Ir-reġistrazzjonijiet għandhom jintbagħtu lil plantprotection.mafa@gov.mt

Informazzjoni Reġistrata

Għal kull varjetà rreġistrata u għal kull fornitur, għandhom jinkisbu u pprovduti d-dettalji li ġejjin:

• L-isem xjentifiku tal-ispeċi u d-denominazzjoni tal-varjetà;
• L-isem u d-dettalji tal-kuntatt tal-fornitur jew ir-rappreżentant tagħhom;
• Iż-żona fejn il-fornitur jista’ jikkonsenja ż-żerriegħa jew il-patata taż-żrigħ lill-utent fiż-żmien normali meħtieġ għall-kunsinna;
• Il-pajjiż jew ir-reġjun li fih il-varjetà ġiet ittestjata u approvata għall-fini tal-katalgi komuni tal-varjetajiet tal-ispeċi tal-pjanti agrikoli u l-ispeċi tal-ħaxix kif definiti fid-Direttiva tal-Kunsill 2002/53/KE dwar il-varjetajiet komuni ta’ katalgi ta’ speċi ta’ pjanti agrikoli u d-Direttiva 2002/55/KE dwar il-marketing ta’ żrieragħ tal-ħxejjex;
• Id-data minn meta ż-żrieragħ jew il-patata taż-żrigħ se jkunu disponibbli;
• L-isem u/jew in-numru tal-kodiċi tal-awtorità ta’ kontroll jew il-korp ta’ kontroll responsabbli għall-kontroll tal-operatur kif imsemmi fir-Regolament (UE) 2018/848.

Il-fornitur irid jinforma minnufih lill-maniġer tad-database jekk kwalunkwe waħda mill-varjetajiet irreġistrati ma tkunx disponibbli aktar fejn dawn l-emendi għandhom jiġu rrekordjati fid-database. Jekk jogħġbok għenna biex niżguraw li d-database hija aġġornata billi tirrapporta kwalunkwe ineżattezza jew informazzjoni skaduta.

Minbarra l-informazzjoni speċifikata hawn fuq, id-database fiha lista tal-ispeċi elenkati.

Aċċess għall-informazzjoni.

L-informazzjoni fid-database hija disponibbli fuq l-Internet, bla ħlas, għall-utenti taż-żrieragħ jew il-patata taż-żrigħ u għall-pubbliku.

Il-maniġer tad-database għandu jiżgura li l-utenti kollha jiġu infurmati kull Diċembru bil-proċeduri fis-seħħ għall-estrazzjoni tal-informazzjoni.

Id-Database għal Malta ta’ Materjali Riproduttivi ta’ Pjanti Organiċi tista’ tiġi aċċessata permezz ta’ din il-link.